Lima ang Presidential Security Guard sugatan sa pananambang ng NPA sa Cotabato

Sugatan ang limang miyembro ng Presidential Security Group (PSG) ni Pangulong Rodrigo Duterte at isang CAFGU habang isa namang sibilyan ang nasawi sa pananambang ng mahigit sa 100 miyembro ng mga rebeldeng New People’s Army (NPA) na nauwi sa bakbakan sa highway ng Brgy. Katipunan, Arakan, North Cotabato, kahapon ng umaga.

Ayon sa Balitang Ahensiya ng Ahlul-bayt (ABNA24) – Sinabi ni Brig. Gen. Gilbert Gapay, Spokesman ng Martial Law sa Eastern Mindanao, alas-6:30 ng umaga nang mangyari ang pananambang ng grupo ng isang alyas Ka Jinggoy laban sa PSG convoy sa nasabing lugar na mabilis namang gumanti ng putok sa mga rebelde.

Kinilala ang mga nasugatang PSG na sina Corporal Ayam Alia, Cpl. Rodel Ledesma, Staff Sgt. Gerry Gerry Tursal, dalawang kinilala lamang sa mga apelyidong Matumbay at S Lisondra na kapwa Staff Sgt.; pawang kasapi ng PSG at ang CAFGU member na nakilalang si Ben Padua habang inaalam pa ang pangalan ng nasawing sibilyan.

Samantalang isa namang asset ng Criminal Investigation and Detection Group (CIDG) na kinilalang si Rogelio Genon ang iniulat na dinukot pa ng mga rebelde sa kanilang pagtakas.

Sa report, ang convoy ng PSG sa pamumuno ni Technical Sgt Ferbello Galleno kasama ang guide na sibilyan at isa pang CIDG asset ay galing sa Davao City patungong Cagayan de Oro City lulan ng kulay itim na Nissan Patrol at kulay puting Ford 150, isang customized bullet proof vehicle nang paulanan ng bala ng mga rebelde pagsapit sa lugar.

Inihayag naman ni Col. Michael Aquino, Spokesman ng PSG na hindi bahagi ng advance party ni Pangulong Duterte ang kanilang mga tauhan na nakipagsagupa sa mga rebelde manapa’y bahagi lamang ng administrative movement ng kanilang unit.

Ayon kay Aquino, nagpanggap umanong mga sundalo ang mga rebelde na nagsagawa ng checkpoint sa lugar gamit ang mga pekeng patches ng Army’s 3rd Infantry Battalion na may signage ng Task Force Davao.

Samantala inatasan ni Pangulong Rodrigo Duterte ang mga miyembro at opisyal ng government peace panel na huwag ituloy ang peace negotiation sa National Democratic Front (NDF) hangga’t hindi tumitigil ang mga rebelde sa pag-atake sa tropa ng pamahalaan sa Mindanao.

Kaugnay nito, nakatakdang magsagawa ng back-channel talks ang grupo ni government chief negotiator Labor Sec. Silvestre Bello III sa NDF para talakayin ang pagbabalik ng peace talks ng magkabilang panig para sa 5th round ng pag-uusap.

Sinabi ni Office of the Presidential Adviser on the Peace Process (OPAPP) Sec. Jesus Dureza, ang resumption ng peace negotiation ay nakadepende sa commitment ng mga rebelde sa itatakdang guidelines para sa posibleng ceasefire deal.